NIDERLANDLARDA GEÇIRILEN AHALTEKE ATLARYNYŇ DÜNÝÄ ÇEMPIONATYNYŇ NETIJELERI JEMLENDI

Niderlandlar Patyşalygynda ahalteke atlarynyň arasynda geçirilen atly sport we gözellik bäsleşikleriniň dünýä çempionatynda bäsleşigiň netijeleri jemlendi. “Ahalteke atlarynyň arasynda dünýä çempiony – 2026” atly bäsleşikde Fransiýadan A.Martinesiň Ýyndam atly gara reňkli aty “Absolýut çempion” diýen ada we “Dünýä çempiony” baýragyna mynasyp boldy. Ýeňijä Gahryman Arkadagymyz hormatly Prezidentimiziň adyndan iň häzirki zaman ýeňil awtoulagynyň açary dabaraly ýagdaýda gowşuryldy.

“Ýaş atlaryň çempiony” atly bäsleşikde Halkara ahalteke atçylyk sport toplumynyň Meledag atly bedewi ýeňiji boldy we bäsleşigiň kubogyna mynasyp boldy. “Ýewropanyň iň gowy bedewi” bäsleşiginde Fransiýadan hususy atşynas A. Beýliniň Agana Şael atly aty ýeňiji boldy we kuboga eýe boldy. “Iň owadan bezelen at” bäsleşiginde Türkmenistanyň Prezidentiniň Ahalteke atçylyk toplumynyň Toýly atly mele reňkli bedewi ýeňiji boldy we kubogy aldy.

Gözellik bäsleşiklerinde 1 we 2 ýaşar atlaryň arasynda Halkara ahalteke atçylyk sport toplumynyň Jerengözli, 3 ýaşar atlaryň arasynda şol toplumyň Güneş atly bedewleri ýeňiji boldy. 3 we 4 ýaşar bedewleriň arasynda fransiýaly S.Plaýiniň hojalygyna degişli Ming-de-Ahal, 5 we uly ýaşar atlaryň arasynda Ukrainadan B Mamelekowyň hojalygyna degişli Ýagşyja – Owadan ýeňiji boldy.

Atyň owadan hereketi üçin (dressaž) bäsleşiginde ukrainaly atşynas Liliýanyň Bady-Saba atly aty, konkur bäsleşiginde Türkmenistanyň Milli atly sport merkeziniň türgeni Yhlas Çopanow ýeňiji boldy.

Halkara döredijilik bäsleşiginde heýkeltaraşlyk boýunça P.Patdykow, nakgaşçylyk boýunça A.Atahanow, halyçylyk boýunça O.Amanjaýewa, fotosurat boýunça ukrainaly W.Osowskiý, zergärçilik boýunça A.Sähedow ýeňiji diýlip yglan edildi.

Şeýle hem ahalteke atlarynyň dünýä çempionatynyň çäklerinde “Galkynyş” milli at üstündäki oýunlar toparyna “Tomaşaçylaryň söýgüsini gazanan” atly baýrak gowşuryldy.