TÜRKMENISTANDA BÜTINDÜNÝÄ SAGLYK GÜNI GIŇDEN BELLENILDI

Türkmenistanda dünýä bileleşigi bilen bilelikde Bütindünýä saglyk güni giňden bellenildi. Esasy baýramçylyk dabaralary we köpçülikleýin welosipedli ýöriş Aşgabatda Prezident Serdar Berdimuhamedowyň gatnaşmagynda geçirildi.

Aşgabatda Bütindünýä saglyk güni mynasybetli geçirilen köpçülikleýin welosipedli ýöriş Saglyk ýolunyň başlanýan ýerinde badalga alyp, şäheriň merkezi böleginde — Ruhyýet köşgüniň ýanynda tamamlandy.

Bütindünýä saglyk güni mynasybetli Arkadag şäherinde, ýurduň ähli welaýatlarynda hem köpçülikleýin welosipedli ýörişler geçirildi. Bu ajaýyp baýram mynasybetli 1 — 7-nji aprel aralygynda Türkmenistanyň çar künjeginde dürli çäreler, şol sanda mowzuklaýyn maslahatlar, “tegelek stol” duşuşyklary, sergiler, okuw sapaklary, bedenterbiýe-sagaldyş, medeni çärelerdir dabaralar, sport ýaryşlary guraldy.

Türkmenistanyň başlangyjy bilen Birleşen Milletler Guramasynyň Baş Assambleýasy 2018-nji we 2022-nji ýyllarda welosiped sürmek medeniýetini ösdürmek boýunça Kararnamalary kabul etdi.