Türkmenistan we ÝUNESKO bilim ulgamynda hyzmatdaşlygy ösdürmegi maksat edinýärler

Türkmenistanyň bilim ministri Jumamyrat Gurbangeldiýew 25-nji martda Fransiýanyň Pariž şäherinde ýerleşýän ÝUNESKO-nyň ştab-kwartirasynda birnäçe duşuşyk geçirdi. Duşuşyklarda guramanyň ýolbaşçylary bilen bilim ulgamynda halkara hyzmatdaşlygyny ösdürmegiň meseleleri ara alnyp maslahatlaşyldy. Bu barada Türkmenistanyň Bilim ministrligi habar berdi.

ÝUNESKO-nyň Baş direktory Haled Al-Enany bilen geçirilen gepleşikleriň dowamynda taraplar hyzmatdaşlygyň häzirki ýagdaýyny we geljegine garadylar. Şeýle hem ýokary hilli bilime deň elýeterliligi üpjün etmek, bilim ulgamlaryny sanly özgertmek we emeli aň tehnologiýalaryny okuw işine ornaşdyrmak meselelerine aýratyn üns berildi. 

Duşuşykda şeýle hem bilelikde amala aşyrylýan başlangyçlaryň netijesinde milli bilim ulgamynyň yzygiderli pugtalandyrylýandygy we onuň dünýä bilim giňişligine utgaşmagyna yzygiderli ýardam berilýändigi nygtaldy.

ÝUNESKO-nyň ýolbaşçysy Türkmenistanda alnyp barylýan özgertmelere ýokary baha berdi we olaryň ulgamlaýyn hem-de geljege gönükdirilen häsiýetini aýratyn belledi. Şeýle hem ýurduň Durnukly ösüş maksatlarynyň 4-nji maksadyna ýetmekdäki goşandy aýratyn nygtaldy.

Saparyň çäklerinde ÝUNESKO-nyň Baş direktoryň bilim boýunça orunbasary Stefania Jannini bilen aýratyn duşuşyk geçirildi. Duşuşyk Bilim boýunça global monitoring hasabatynyň (GEM Report 2026) tanyşdyrylyşynyň çäklerinde geçirildi. Taraplar bilimde sanlylaşdyrma, ömürboýy bilim almak mümkinçilikleriniň ösdürilmegi we guramanyň degişli düzümleri bilen hyzmatdaşlygyň giňeldilmegi meselelerini ara alyp maslahatlaşdylar.

Aýratyn üns Aşgabat şäheriniň ÝUNESKO-nyň Okuw şäherleriniň global toruna gatnaşmagyna, şeýle hem “Sanly ylym” atly täze kafedrany açmagyň mümkinçiliklerine we Bilimde maglumat tehnologiýalary instituty bilen hyzmatdaşlyga gönükdirildi.