KIÝEW ŞÄHERINDE TÜRKMEN HALYSYNYŇ BAÝRAMY MYNASYÝETLI GEÇIRILEN ÇÄRE

Kiýew şäherindäki Magtymguly adyndaky kitaphanasynda Türkmen halysynyň baýramy mynasybetli medeni we sungat sergi çäresi geçirildi.

2025-nji ýylyň 25-nji maýynda Türkmenistanda birnäçe baýramçylyk, ýagny Aşgabat şäheriniň 144 ýyllygy we Türkmen halysynyň güni giňden we dabaraly ýagdaýda bellenilýär.

Baýramçylykdan bir hepde öň, Kiýew şäheriniň Swýatoşinskiý etrabynda ýerleşýän “Swiçado” merkezleşdirilen kitaphana ulgamynyň Magtymguly adyndaky kitaphanasynda etrabyň okuwdan daşary “Suratkeşler” merkeziniň “Kümüş tahýasy” atly döredijilik sergisi açyldy. 7-15 ýaş aralygyndaky çagalar öz çeken suratlarynda türkmen ertekileriniň ajaýyp dünýäsini we olaryň keşplerini, türkmen topragynyň gözelligini suratlandyrdylar.

“Türkmeniň medeniýeti we durmuşy. Halyçylyk sungaty” atly sergi 25-nji maýda Magtymguly adyndaky kitaphanasynda türkmen halysynyň baýramy mynasybetli geçirilen medeni we çeperçilik çäräniň çäklerinde jemlenildi. Çärä Türkmenistanyň Ilçihanasynyň wekilleri, ýaş suratkeşler we olaryň ene-atalary, çagalar ýazyjylary, kitaphanaçylar, türkmen talyplary we türkmen diasporasynyň wekilleri gatnaşdylar.

Çärede Türkmenistanyň Ukrainadaky Ilçihanasynyň diplomatik işgärleri çykyş edip, gatnaşyjylara ÝUNESKO-nyň Adamzadyň maddy däl medeni mirasynyň sanawyna girizilen haly dokamagyň taryhy, türkmen halysynyň baýramyny bellemegiň däpleri, gadymy senetçiligiň syrlaryny özleşdiren zenan haly dokaýjylaryň ussatlygy, türkmen halysynyň meşhurlygy we dünýäde haly dokamagyň milli sungaty barada maglumatlary ýetirdiler.

Diplomatlar milli däp-dessurlara hormat goýmagyň, halklar bilen dostlukly gatnaşyklary saklamagyň we medeni tejribe alyşmagyň medeniýetimiziň bir bölegidigini, Halkara parahatçylyk we ynanyşmak hem-de Türkmenistanyň Bitaraplygynyň 30 ýyllygynyň bellenilýän ýylynda aýratyn ähmiýete eýe bolandygyna üns çekdiler. Diplomatlar, dostlukly ukrain halkynyň baý medeni mirasynyň eserleriniň dünýä medeni mirasynyň aýrylmaz bölegidigini we ÝUNESKO-nyň Adamzadyň maddy däl medeni mirasynyň sanawyna girizilendigini bellediler.

Çäräniň dowamynda çagalar ýazyjysy Galina Jemulanyň türkmen halk döredijiliginiň žanrynyň meşhur bolmagyna goşant goşýan “Iki awçy” atly halk ertekisiniň ukrain dilinde audio taslamasy hödürlendi.

Magtymguly kitaphanasynyň müdiriniň wezipesini ýerine ýetirijisi Ýuliýa Lopatanyň, “Suratkeşler” merkeziniň başlygy Ýuliýa Apanasenkonyň we beýleki gatnaşyjylaryň çykyşlarynda dostlukly halklaryň medeni mirasyny, medeni-ynsanperwer we bilim hyzmatdaşlygyny hem-de alyş-çalşygy ösdürmegiň ähmiýeti barada bellediler.

Türkmen halysynyň baýramynyň çäklerinde mowzuk boýunça surat sergisi geçirildi, türkmen halylary, haly dokamak we türkmen halysynyň milli muzeýinde bellenilmegi bilen baglanyşykly wideo rolik, şeýle hem Magtymguly adyndaky muzeý otagyna gezelenç we Türkmenistanyň we türkmen kitap önümleriniň, bezeg we amaly haşam sungat eserleriniň tanyşdyrylyşy geçirildi.

Diplomatik işgärler dabaraly ýagdaýda ýaş suratkeşleriň we olaryň ýolbaşçysynyň tagallalaryna ýokary baha berip, sergä gatnaşyjylara hormat hatlaryny we milli ýadygärlik sowgatlary gowşurdylar.

Türkmen halysynyň baýramy – agzybirlik we dostluk, öz medeniýetine buýsanç günüdir.