Türkmenistanyň Ukrainadaky Ilçihanasynyň “Gündogaryň beýik akyldary we nusgawy şahyry Magtymguly Pyragynyň ähliumumy adamzadyň ruhy gymmatlyklarynyň hazynasyna goşan goşandy” atly medeni çäresi

21.11.2024ý. senede Türkmenistanyň Ukrainadaky Ilçihanasy tarapyndan “Gündogaryň beýik akyldary we nusgawy şahyry Magtymguly Pyragynyň ähliumumy adamzadyň ruhy gymmatlyklarynyň hazynasyna goşan goşandy” ady bilen Ukrainanyň medeniýet, sungat we bilim işgärleriniň, Şewçenko etrap medeniýet bölüminiň wekilleriniň we Söwda-senagat palatasynyň wekilleriniň, Ylmy-barlag ulgamynyň işgärleriniň, daşary ýurt Ilçileri we diplomatlarynyň, Kiýew şäheriniň milli kitaphanalarynyň ýolbaşçylarynyň we wekilleriniň, şahyrlaryň, ýazyjylaryň, terjimeçileriň we kitap neşirçileriň, kompozitorlaryň, orta mekdepleriň ýolbaşçylarynyň, aýdym-saz we sungat mekdepleriniň mugallymlarynyň, ýokary okuw jaýlarynyň we metbugat wekilleriniň, türkmen kowmunyň we talyplarynyň gatnaşmagynda medeni çäresi geçirildi.

Ilçi T.Ataýew çykyşynyň dowamynda «Pähim-paýhas ummany Magtymguly Pyragy» ýylynyň netijelerine syn berdi. Türkmenistanyň ähli künjeklerinde we dünýäniň onlarça ýurtlarynda Magtymguly Pyragynyň 300 ýyllygy mynasybetli medeni, bilim, döredijilik we ylmy çäreleri geçirilmeginiň, görnükli şahyryň edebi mirasynyň ýaýbaňlandyrylmagynyň, onuň pelsepewi dünýäsine ünsi çekmegiň, bu ugurdaky ylmy gözlegleri çuňlaşdyrmagyň esasy ileri tutulan maksalar bolup durýandygy aýdyldy.

Soňky ýyllarda Türkmenistan bilen ÝUNESKO-nyň arasyndaky hyzmatdaşlygyň işjeňleşýändigi, şahyryň golýazmalarynyň ÝUNESKO-nyň abraýly Dünýä hakydasy sanawyna goşylmagynyň möhüm ähmiýete eýedigi bellenildi. Ilçi T.Ataýew Türki medeniýetiniň halkara guramasy – TÜRKSOÝ tarapyndan 2024-nji ýyly «Türki dünýäsiniň beýik şahyry we akyldary Magtymguly Pyragy ýyly» diýlip yglan edilendigini we 2024-2025-nji ýyllarda ÝUNESKO bilen bilelikde bellenip geçiljek şanly seneleriň sanawyna goşulandygyny aýtdy we gadymy Änew şäheriniň türk dünýäsiniň medeni paýtagty hökmünde yglan edilmeginiň Akyldar şahyryň döredijiligine we Änew medeniýetiniň türki dünýäsinde ýokary baha berilýändigine şaýatlyk edýändigini nygtady.

Soňra, T.Ataýew myhmanlaryň ünsüni şu ýylyň 11-nji oktýabrynda «Döwürleriň we siwilizasiýalaryň özara arabaglanyşygy – parahatçylygyň we ösüşiň binýady» atly geçirilen ýokary derejeli halkara foruma çekip, onuň işine dürli ýurtlaryň döwlet baştutanlarynyň gatnaşandygyny habar berdi. Konferensiýada şahyryň döwletliligiň milli ýörelgelerini ösdürmekdäki orny we ähliumumy adamzat gymmatlyklarynyň hazynasyna goşan goşandy barada giňişleýin pikir alşyldy. Türkmenistanyň Prezidenti Serdar Berdimuhamedow bu forumda eden çykyşynda Magtymgulynyň beýik we baý mirasynyň onuň parahatçylyk, adalat, gumanizm, dostluk we doganlyk ýaly sarsmaz pikirleriniň Türkmenistanyň daşary syýasatynyň esaslaryny kesgitlemekde uly täsiri ýetirendigini belläp geçdi.

Türkmenistanyň Ilçisi Magtymguly Pyragynyň 300 ýyllygy mynasybetli Ukrainada geçirilen medeni çäreleriň netijelerini jemläp, Magtymguly Pyragynyň döredijiligine, ýurdumyzyň wajyp şanly senelerine we baý medeni mirasyna ukrain jemgyýetçiliginde gyzyklanmanyň artýandygyny nygtady. Bu ýyl Magtymgulynyň pelsepewi eserleriniň ukrain okyjylarynyň arasynda has giňden ýaýradylmagy, şahyryň goşgularynyň ukrain dilinde “Magtymguly Pyragy. Ylham” atly täze ýygyndynyň neşir edilendigi aýdyldy. Bu kitabyň tanyşdyrylyş dabarasynyň şu ýylyň maý aýynda Ukrainanyň Milli çagalar kitaphanasynda geçirilendigi bellenildi. Şahyrana söz ussadynyň eserini wagyz etmekde aýratyn hem Kiýew şäherindäki Magtymguly adyndaky kitaphanasynyň işjeňligine ýokary baha berlip, bu kitaphanada ýylyň dowamynda köp sanly tematiki çäreleriň geçirilendigi habar berildi.

Çäräiniň dowamynda Türkmenistanyň Ilçisi Toýli Ataýew Türkmenistanyň “Magtymguly Pyragynyň 300 ýyllygyna” atly ýubileý medaly bilen Magtymgulyşynas alym, Ukrainanyň Taras Şewçenko adyndaky “Proswita” bütindünýä jemgyýetiniň ýolbaşçysy Pawlo Mowçany sylaglamak hakyndaky Türkmenistanyň Prezidenti Serdar Berdimuhamedowyň degişli Permanyny okady we oňa Türkmenistan Prezidentiniň adyndan ýokary baýragy gowşurdy.

Soňra, Ilçi T.Ataýew Ukrainanyň Taras Şewçenko adyndaky Kiýew milli uniwersitetiniň Ukrain dilini öwreniş ylmy-barlag institutynyň baş ylmy işgäri Mikola Waskiwe Türkmenistanda saparda wagty Türkmenistanyň Mejlisiniň Başlygy D.Gulmanowa tarapyndan “Magtymguly Pyragynyň 300 ýyllygyna” atly ýubileý medalynyň gowşurylandygyny aýdyp, ony bu ýokary döwlet sylagyň berilmegi bilen gutlady.

Soňra Ilçi T.Ataýew Magtymguly Pyragynyň doglan gününiň 300 ýyllygy mynasybetli şahyryň ömrüni we döredijiligini öwrenmekde işjeň gatnaşan Magtymgulyşynas alymlara Türkmenistanyň Daşary işler Ministrliginiň adyndan el halysy we Magtymguly Pyragynyň kitaby gowşuryldy.

Medeni çäräniň çäginde Türkmenistanyň taryhyny, binagärçiligini, medeniýetini we türkmen halkynyň däp-dessurlaryny açyp görkezýän suratlaryň sergisi, manekene geýdirilen milli egin-eşikleriniň sergileri, şeýle hem Türkmenistanyň Prezidenti Serdar Berdimuhamedowyň “Ýaşlar-Watanyň daýanjy” we “Änew müňýyllyklardan gözbaş alýan medeniýet” atly kitaplary, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň, hem-de Magtymguly Pyragynyň dürli dillere terjime edilen kitaplarynyň sergisi guraldy.

Türkmen ýaşlary çäräniň dowamynda baýramçylyk programmasy bilen çykyş etdiler, Magtymguly Pyragynyň goşgularyny ene dilinde we ukrain dilinde çeper okadylar hem-de milli saz gurallarda konsert nomerleri bilen çykyş etdiler.