ÝB we Merkezi Aziýa ýurtlary birnäçe bilelikdäki taslamalary durmuşa geçirýärler

Daşkentde “Ýewropa Bileleşigi (ÝB)— Merkezi Aziýa” 3-nji ykdysady forumy tamamlandy. Forum sebitler arasyndaky strategik hyzmatdaşlygy giňeltmäge we ykdysady gatnaşyklary pugtalandyrmaga gönükdirlendir. Forumyň netijeleri boýunça taraplar Aral sebitinde çig mal taýdan möhüm we ýerleriň zaýalanan böleklerini dikeltmek bilen bagly birnäçe taslamalara gol çekdiler.

Aýratyn-da, forumyň çäginde birnäçe esasy başlangyçlar kabul edildi:

- DATA4CRM — möhüm çig mal baradaky maglumatlara elýeterliligi ýokarlandyrmak we geografiki maglumatlar ulgamlaryny ösdürmek maksady bilen amala aşyryljak taslama. ÝB bilen Finlandiýa bilelikde amala aşyrar.

- SECURE CRM — UNODC bilen UNECE bilelikde alyp barjak, €3 million býujeti bolan we möhüm çig mallaryň üpjünçilik zynjyrlarynyň açyklygyny we durnuklylygyny ösdürmäge gönükdirilen taslama.

- GROW CRM — pudagy köpugurly ösdürmek maksady bilen ýerine ýetirilýän tehniki-ykdysady derňewleri geçirmek we kadalaşdyryjy binýadyny döretmek boýunça, €3 million býujeti bolan taslama. 

- Aral deňzi — Ýewropa Bileleşigi tarapyndan €8,8 million möçberinde maliýe serişdeleri bilen goldanylýan hem-de Ýewropa Maýa goýum banky we AFD tarapyndan her biri €20 million möçberinde karz serişdeleri arkaly maliýeleşdiriljek tokaý dikeldiş taslamasy. Sebitiň ekologik we durmuş-ykdysady taýdan dikeldilmegine gönükdirilendir.

- BOMCA we CADAP maksatnamalary — umumy maliýe serişdeleri degişlilikde €12 million we €18 million bolan bu maksatnamalar serhetýaka sebitlerde howpsuzlygy ýokarlandyrmaga gönükdirilendir.

Çäräniň dowamynda ÝB-niň we Merkezi Aziýa ýurtlarynyň wekilleri strategik maýa goýumlaryny ilerletmek, sanly özgertmeleri durmuşa geçirmek, energetika infrastrukturasynda ösüşi gazanmak, döwlet dolandyryşy ulgamyndaky özgertmeleri hem-de durnukly ykdysady ösüşi üpjün etmek meselelerini hem ara alyp maslahatlaşdylar.

ÝB-niň halkara hyzmatdaşlyk boýunça komissary Ýozef Sikela “Global Gateway” strategiýasynyň ähmiýetini belläp, täze başlangyçlaryň durnukly ösüşe ýardam berjekdigine, sebitleýin durnuklylygy pugtalandyrjakdygyna hem-de maýadarlara täze mümkinçilikleri döretjekdigine ynam bildirdi.